جواز الناس اللي لا مؤاخذة مش شواذ

 

تويتة للرئيس الأمريكي باراك أوباما بيعلن فيها حصول الأمريكان الشواذ و المثليين على حق الزواج و مارك ابن أم مارك بتاع الفيس بوك أعلن تأييده لحكم المحكمة ده و عمل خاصية تلوين الصورة الشخصية على فيس بوك بألوان ترمز إلى دعم حقوق الشواذ , و عليه بقى يا معلم الدنيا اتقلبت في مصر , السوشيال ميديا بيتكلم , و كوميكس و ناس عملت صورتها بالألوان ما بين ناس مش عارفة هي البتاعة دي مقصود بيها ايه و ناس تانية خدت جنب بيتكلم عن الحقوق و الحريات هما أحرار يا عم و من حقهم لا مؤاخذة يعني و لونو صورة البروفايل تضامنا معاهم , و بدأ جدل ما بين جناحين جناح شايف إن نهاية العالم قربت خلاص و إن دي وساخة و قلة أدب و حرام طبعا , و جناح تاني قالك أنتم ناس عديمي الحريات اتعلموا من امريكا شوفوا سبقتنا بقد ايه بسبب تفكيركم المتخلف ده ..

و مشاركة مننا في الحملة النووية المهلبية دي , قررنا إننا نطلق حملة لدعم لا مؤاخذة حقوق الناس اللي مش شواذ في الجواز , المصريين اللي بقالهم كام يوم بيتخانقوا حوالين حق جواز الشواذ عندهم بحسب احصائيات الحكومة و الجهاز المركزي للتعبئة و الاحصاء 8.6 مليون فتاة ما بين سن 18 و 35 يبحثن عن زوج , منهم 2.5 مليون فتاة ما بين سن ال 30 و ال 35 , النسب دي في تزايد مستمر بحسب الاحصائيات الرسمية و اللي بتجريها منظمات المجتمع المدني كمان بشكل يقولك إن جواز الناس اللي مش شواذ في مصر يصبح كل يوم أصعب و أصعب ..

نظريا عشان تبدأ حياة مع زوجة فأنت محتاج شقة مش لازم تبقى تمليك لأنك ممكن تأجر شقة من حوالي 5 مليون وحدة سكنية خالية في مصر و محتاج شوية عفش من دمياط ببتاع 30 ألف جنية بالكتير و هي هتجيب شوية أجهزة كهربائية على 15 ألف و لا 20 ألف جنية و شوية أطباق تاكلوا فيهم و سخان و خلصنا على كده الشقة بقت جاهزة نظرياً لأن أي حد يسكنها

لكن عمليا اللي بيحصل في مصر أنتم محتاجين أوضة أطفال رغم إن أقرب طفل ممكن يجي هيبقى بعد 7 شهور من الجوازة ده لو مكملش التسع شهور و هيقعد سنة على الأقل جنبكم لغاية ما ربنا يكرمكم و تنقلوه اوضة لوحده ,  و محتاجين نجف بالرغم من انكم مبتشغلوهوش و بتشغلوا لمد عادية , و محتاجين نيش تحطوا فيه الصيني اللي مبتاكلوش فيه , و سجاجيد غالبا مبتفرشوهاش , و لو فرشتوها بتغطي على السيراميك الغالي اللي جايبينه , ده غير الشبكة و المهر , آه و الشقة التمليك اللي لازم تيجي لأن بنتي متسكنش في شقة بالايجار أبدا :D  و مصاريف الخطوبة و الفرح و المعازيم عشان بنتي مش أقل من بنت خالتها

الأمر اللي بيخلي نسب العنوسة تزيد و تكبر و تتضخم زي كرة التلج , و لأننا شعب متدين بطبعه فعشان تتجوز في الحلال محتاجلك بتاع نص مليون جنية على الأقل , و لكن بالنسبة للحرام فالموضوع بقى سهل جدا و بأرخص التكاليف , و بجنسيات مصرية و غير مصرية كمان , فمجتمعنا المتدين بطبعه بيسهل الحرام و يصعب الحلال ...

أما بقى لو ربنا كرمك و قدرت تعدي المتاهة الاقتصادية دي , فتفتكر مثلا إنك ممكن تتساب كده و ميطلعوش عين أهلك ؟ , مجموعك في الثانوية العامة مهم جدا لجواز حضرتك أو حضرتك , ذاكري في ثانوية عامة عشان تخشي كلية قمة فتتجوزي مهندس أو دكتور, و بالتالي لو ربنا كرمك و جبتي مجموع فالمجتمع و الناس و الأهل و الوطن هيبقى عايزك تتجوزي دكتور أو مهندس في حين بقية المهن لأ معلش مش هينفع أصلها دكتورة و كانت جايبة مجموع قد ايه, إلا طبعا لو كان ظابط أو وكيل نيابة فده بياخد درجات تفوق رياضي و ربنا بيكرمه فتنسيقه بيجيبه للجوازة ... بمجهوده

فجنب رحلتك عشان تجيب فلوس لازم بردو متنساش مذاكرتك في ثانوية عامة و إلا هيرفضوا يجوزوك بنتهم و ابدأ دور على واحدة من مجموعك بقى يا أخي

طبقا للجهاز المركزي للتعبئة و الاحصاء نسبة الذكور في مصر 51% و نسبة الاناث 49% , المشكلة بقى إن عدد الاناث اللي بيخشوا ثانوية عامة بقوا أكتر من عدد الذكور بتوع ثانوية عامة و نسبة البنات اللي بتجيب مجموع و تخش كليات قمة أكبر من نسب الذكور ما عدا في كليات الهندسة طبعا و هنا يبقى عندنا نسبة العنوسة بتزيد كما و كيفا و برا و بحراً و جواً

لو ربنا أكرمك أو ربنا أكرمِك و عديتوا اللي فات ده كله  فأنت قدامك طريق من 3 :

1)    حياة مستقرة و هادية و بارك الله فيم رزق تنتهي بالوفاة الطبيعية و أنتم الاتنين لسه متجوزين عادي و ده إلى الآن لسه النسبة الأكبر في مصر من فضل ربنا , إن الجوازات بتكمل في الغالب

2)    أو الطريق التاني إن حظك المنيل يتنيه مكمل معاك و بعد كل الفيلم ده تكون واحد من 400 حالة طلاق يومية في مصر بحسب الجهاز المركزي للتعبئة و الاحصاء  

3)    أو الطريق التالت إن رجليك تاخدك لغاية السجن عشان الكمبيالات و الوصولات اللي ماضيها على نفسك أو اللي أبوك أو أمك ماضينها على نفسهم , وسط آلاف الحالات من اللي بيخشوا السجن غارمين أو غارمات و هما بيجهزوا ابنهم أو بنتهم 

من الحالات دي كانت حالة شهيرة لواحدة اسمها الست ( رتيبة ) اتحبست 11 سنة في الوقت اللي قعدت فيه بنتها في السجن 9 سنين و التانية 6 سنين و مات الابن في السجن لأنهم كانوا موقعين كضامنين ليها على الايصالات بسبب دين قيمته 50 ألف جنية, عشان تجهز بناتها, و لولا عفو رئاسي من الرئيس السابق عدلي منصور بعد حملة مطالبات على فيس بوك كانت كملت في السجن ل 2037

ده يوصلك لنتيجة مهمة جدا, في مصر لو أنت متهم في قضايا قتل متظاهرين احتمال كبير تخرج, انما لو فكرت تتجوز فاحتمال كبير هتتحبس و بأقصى عقوبة ممكنة

هل احنا عاملين الحلقة دي عشان نقولك طريقك مسدود يا ولدي و طريقك مسدود يا بنتي و مفيش أمل هتعنسوا خلاص ؟

لأ الحلقة دي مش عشان كده لكن الحلقة دي عشان نقول إن في مجتمع الطبيعيين فيه من الصعب إنهم يحصلوا فيه على حقهم في الجواز فيبقى من العته إننا نزيط حوالين حق الشواذ في الجواز

أنا أتفهم إن مصر تنتفض مثلا و تتكلم كلها في ازاي نحل مشكلة جواز الناس الطبيعيين اللي مش لاقيين يتجوزوا , اننا نفرح مثلا لو صحينا الصبح لقينا تويتة الرئيس بيقول فيها " المصريون الطبيعيون يمكنهم الزواج الآن , مبروك , لوف وينز يا مصريين " , أما كل ما عدا ذلك فهو عيش في الوهم و الغيبوبة.

 أما عن الأخوة بتوع الحقوق و الحريات و اللي بيتهموا التانيين إنهم متخلفين و رجعيين فموضوع الشواذ ده وصل المحكمة العليا في أمريكا بعد ما 37 محكمة في ولاية أقروا زواج الشواذ و 13 محكمة تانيين في 13 ولاية رفضوه فاتبعت للمحكمة العليا لاصدار قرار نهائي فيم يخص الولايات المتحدة ككل , اعتبرني بقى مواطن من بتوع ال 13 ولاية اللي مش عاجبهم قرار المحكمة العليا هناك أو اللي محاكمهم حكمت ضد الموضوع :D

استنونا في الحلقة الجاية, هنتكلم سوا عن الاقتصاد المعجون, و مصر اللي اتبهدلت خلال السنين اللي فاتت دي بسبب منظومة الجواز و الحياة عندنا.